|
NPC Rwanda yashoje amahugurwa y'Abarimu mu mashuri abanza NPC Rwanda ifatanyije na Minisiteri y'Uburezi (MINEDUC), yateguye amahugurwa ku mikino y'abana bafite ubumuga mu mashuri abanza. Ayo mahugurwa yabaye mu rwego rwo kugirango abana bafite ubumuga babashe kuzajya bakinana na bagenzi babo batabufite mu gihe bari kw'ishuri doreko byagaragaye ko bahezwa mu gihe cy'imikino n'imyidagaduro. Abarimu bahuguwe ku mikino itatu ariyo: Sitball (y'abamugaye ingingo), Goal Ball (y'abatabona) na Boccia (y'abafite ubumuga bukabije cyangwa bukomatanye). Amahugurwa yabaye mu byiciro bibiri bitandukanye:   Icyiciro cya mbere cy'amahugurwa cyabereye i Kigali kuri Stade Amahoro/NPC Rwanda Gymnasium kuva tariki ya 16 - 20/05/2011, naho icyiciro cya kabiri cyabereye kuri Café de Nyamata i Nyamata mu Karere ka Bugesera kuva tariki ya 23 - 27/05/2011. Abarimu bahuguwe uko ari 35 kuri buri cyiciro (70 bose hamwe) batashye biyemeje kwigisha abana iriya mikino kandi bakanakora ikipe y'ikigo izitabira imikino ya Sitball izahuza amashuri kuva mu kwezi kwa Nyakanga (July). Mu byo bigishijwe harimo n'uburyo bwo gutoza abana bafite ubumuga ndetse n'ibyiciro by'ubumuga. Abahuguwe bose bahawe impamya bumenyi n'ibikoresho bya siporo bizabafasha guteza imbere umukino wa Sitball ku mashuri yabo.    Amahugurwa yashojwe na Bwana BIZIMANA Dominique uhagarariye imikino y'Abamugaye mu Rwanda, ashimira cyane MINEDUC kuri iki gikorwa cy'amahugurwa, anasabako hategurwa andi nkayo kugeza ubwo ibigo by'amashuri byose bibasha gukina umukino wa Sitball. Yongeye kuyishima kuri gahunda nziza ifite yo gushyira Sitball mu mikino ikinwa muri Interscolaire ikazaba igiye gukinwa bwa mbere mu mashuri kuva mu kwezi kwa 7. Abarimu bahuguwe bagaragaje impungenge z'uko nta bibuga bafite byo gukiniraho n'ibihari bikaba bitameze neza kuburyo byakinirwaho bicaye hasi, abizezako Minisiteri n'abafatanyabikorwa bayo barimo kureba uburyo nabyo byakwitabwaho, mu myaka itaha bakazajya babyubaka neza bateganyako abana bafite ubumuga nabo babasha kubikiniraho. Please find more photos on NPC Rwanda Facebook By Celestin NZEYIMANA |
